Nazirlər Kabinetinin 412 nömrəli Qərarına dair Izah
Qərar Azərbaycan Respublikasının Meşə Məcəlləsinin 34-cü maddəsinə uyğun, hesablanmış meşəqırma həcmi meşə fondundan səmərəli, uzunmüddətli istifadənin zəruriliyi nəzərə alınmaqla, meşə quruluşu işlərinin nəticələrinə uyğun olaraq qəbul edilmişdir.
Qərarın qəbul edilməsi meşələrin sanitariya vəziyyətinin yaxşılaşdırılmasını təmin etməklə, xəstəliklər və zərərvericilərin yayılmasının qarşısının alınması və yanğınların baş vermə ehtimalının azalmasına, eləcə də işğaldan azad edilmiş ərazilərdə Azərbaycan Respublikası Müdafiə Nazirliyinin və Dövlət Sərhəd Xidmətinin hərbi hissələrinin, infrastruktur layihələrini həyata keçirən qurumların odun yanacağı tələbatını ödəməyə, eyni zamanda bioloji cəhətdən davamlı, yüksək məhsuldar meşələrin yetişdirilməsinə xidmət edəcəkdir.
Meşələrin müsbət əhəmiyyətinin yüksəldilməsində sanitar qırmaların rolu böyükdür. Azərbaycan Respublikasının meşələri ictimai əhəmiyyətinə görə I qrup meşələrə aiddir, ona görə də onlarda yaxşılaşdırıma və qoruyucu rolunu artıran ciddi meşə təsərrüfatı rejimi təyin edilmişdir. Burada sanitar qırmalarına, meşələrə qulluq qırmalarına icazə verilir. Yetişmiş və yaşı ötmüş meşələrdə isə onların qoruyucu rolunu təmin edən meşəbərpa qırmalarına icazə verilir. Bu halda meşələrin istismarının və qoruyucu rolunun saxlanması və bərpası əsas amil kimi nəzərdə tutulur.
Qulluq qırmaları azqiymətli ağac və kollar tərəfindən cavan ağacları kölgələnməkdən qoruyan və onların saxlanmasını təmin edən təsiredici vasitədir. Palıd və fıstıq ağaclıqlarında vaxtında aparılan qulluq qırmaları toxumdan əmələ gələn bu qiymətli cinslərin sahədə hakim olmasını təmin edir. Vaxtında qulluq qırmaları aparılmadıqda ikinci dərəcəli qiymətləri olan vələs, titrək qovaq, digər cinslər (xüsusilə onların pöhrədən əmələ gələn nüsxələri) palıdın, fıstığın toxumla yaranan pöhrələrinin və cavan ağac nüsxələrinin məhvinə səbəb olur. Beləliklə, qulluq qırmalarının aparılması ağaclığın keyfiyyətini yaxşılaşdıran çox vacib meşə təsərrüfatı tədbiridir
Azərbaycan Respublikasının Meşə Məcəlləsinin 34-cü maddəsinin üçüncü abzasına əsasən meşə fondunun sərhədi, meşənin qırma yaşı, meşə kateqoriyası dəyişdikdə və meşə fondunda digər dəyişikliklər baş verdikdə hesablanmış meşəqırma həcmi müəyyən edilmiş qaydada yenidən təsdiq edilir.
